Flag Counter

Instagram
 

Mga Hugason Nga Plato

Posted: 06/12/2015  1:30 AM EST

 

 

Sa bata pa ko, sa tanan isugo sa ako ni Mama, akong dili gyud ganahan buhaton ang paghugas og plato. Mag-away ug magtinukluray gyud mi sa akong mga igsuon kung kinsa ang mohugas sa plato. Usahay ako nalang ang mosurinder. Mohugas nalang ko sa pugos. Dala bundak-bundak. 

Nagdako man gud mi sa usa ka balay nga wala’y tarong nga lababo. Wala’y agas ang tubig. Mao sad na ang hinungdan nganung di ko ganahan manghugas kay hasol kaayo. Usahay mahibung gud akong Mama kay gamay nalang mi og plato kay ipanglabay man nako pero dili ko magsaba.

Apan kalooy sa Ginoo, sa tabang sa bakos sa akong Papa ug silhig sa akong Mama; naanad raman pud ko og panghugas nga dili na sakit sa akong buot. Mas sakit man gud ang bakos ug silhig. 

Pagtrabaho na nako diri sa Cebu, usa sa akong kauban sa balay dili mohugas ug plato. Molihok siya sa uban buhaton sa balay apan dili gyud ang paghugas sa plato. Pero nakasabot ra pud ko nadugay kay nagdako man sila nga datu, kami pobre. 

Ang resulta, bisan ug wala nako nagpuyo ni Mama og Papa, ako lang gihapon tighugas sa plato. Pero wala’y problema kay sayon raman ug naanad naman ko. 

Pero sa mga niagi nga bulan, naglagot ko. Naglagot ko isip tighugas ug plato sa balay kay usahay nalang moagas ang tubig tungod sa epekto sa El Niño. Kausa ra gyud moagas ang tubig sa usa ka adlaw, matag alas tres sa kadlawn. 

Ang resulta, matipok ang hugason nga plato ug hugasan nalang nako matag Sabado o Dominggo nga wala koy trabaho. Usahay, masakpan gud nako ang mga ok-ok og ilaga magdula-dula sa among hugason. Na-amigo nalang gud nako sila. 

Usa ka Sabado, samtang nagduka-duka ko nga naghugas og plato nga naminaw pud sa balita sa TV. Adunay balita nga nakapapukaw nako. Napukaw ko og kalit kay ang balita mahitungod sa hugas ug plato. 

Ingon pa sa balita nga gipatay sa anak iyang papa gamit ang kutsilyo kay gikasuk-an kuno siya nganung wala nanghugas. 

Nakaingon ko’s akong kaugalingon nga grabe napud nga anak. Gikasab-an ra gani, mangdunggab man hinoon. Pagka walay batasan. 

Nakahinom-dom ko sa bata pa ko nga kung sugo-on ko ni Papa manghugas ug plato, iya gyud ko nga lambingon, hapyud-hapyuron akong likod, usahay hatagan ko niya og kwarta para mohugas lang. 

Kung nindot akong pamati, manghugas dayun ko ug malipay si Papa. Pero kung gisapot ko, di gyud ko molihok hangtud nga mosaka nalang iyang tingog ug nahibung nalang ko nga nay bakus nilabtik sa akong bagtak. Mapugos nalang gud ko og hugas nga naghilak. 

Pero bisan ug medyo brutal to si Papa. Kahibaw ko pinangga gyud ko niya ug iyang pagbunal dala ra sa kalagot. 

Wala pud ko sukad naghuna-huna ug dautan ni Papa bisan ug nanghubag na akong bagtak sa bakos. Kay pinangga pud nako si Papa ug dako ko og respeto niya. 

Sa pagpadayun sa balita nga akong gitan-aw, akong nahibaw-an nga ang biktima usa diay ka sadista nga pagka papa. Kusog mangulata ug kung mahubog, kusog manglabay ug plato. 

Nisulti sab ang suspect nga wala daw niya hugasi ang mga plato kay ilabay raman daw gihapon sa iyang papa pag-uli. 

Pagkahuman sa balita, nibalik ko sa lababo. Wala na nako gipadayun ug hugas ang mga plato, ako nalang gipanglabay sa basurahan.

Mas nindot ang wala’y plato, wala’y patay.

 

 

 
 

 
There are 13253 visitors (28552 hits) of Gee Pixel Designs
=> Do you also want a homepage for free? Then click here! <=